Laila på 4. plass
– Vi har fått eit knallgodt lag, med Helge André, Silje, Torkil og Laila på topp, seier Gustav Bahus, fylkesleiar i Hordaland Frp.
Hordaland Frp hadde laurdag nominasjonsmøte kor Helge André Njåstad frå Austevoll, Silje Hjemdal frå Bergen, Torkil Åmland frå Bergen og Laila Marie Reiertsen frå Os blei vald på dei fire øvste plassene.
– Dette er eit knallgodt utgangspunkt for eit sterkt stortingsval. Kombinasjonen av by og land og av menn og kvinner er eg veldig nøgd med, seier Gustav Bahus, lokallagsleiar i Os og fylkesleiar i Hordaland Frp.
Kan få fast plass
Bahus ser ikkje bort frå at dei kan klara å få alle fire inn på stortinget etter valet neste haust.
– Vi må nok opp i rundt 20% i Hordaland for å klara det. Det er langt frå umogleg, men det er klart det blir ein kamp.
– Som lokallagleiar er det klart eg er nøgd med at vi har fått Laila inn så høgt oppe på lista, seier Bahus på veg heim til Os saman med nettopp Laila Marie Reiertsen.
Audmjuk og motivert
Reiertsen er audmjuk over tilliten.
– Eg er veldig audmjuk og glad for at partiet set pris på den jobben eg har gjort. Dette gjev motivasjon for å stå på vidare.
– Eg er stolt av Frp som klarar å få til to menn og to kvinner på dei øvste plassene. Vi er eit godt lag med forskjellig bakgrunn som utfyller kvarandre på ein veldig god måte. Eg gler meg til å gå i kampen saman med dei andre, seier Reiertsen.
– Dette laget skal ikkje vera vanskeleg å selgje inn til folk flest, skyt Bahus inn.